授權翻譯：唯社文創 www.plurk.com/onlyheart2020
作者：吐維
台文翻譯：Àm-sî暗時工作室
人名發音對照：
陳佳映 (Tân Ka-ìng)
邵曉明 (Siō Hiáu-bîng)
羅育晨 (Lô Io̍k-sîn)
姜生 (Kiunn Sing)
姜伍 (Kiunn Ngóo)
- - -
「媽！姜叔、阿生！阮轉來矣！」陳佳映的聲對門跤口遐傳來。
我佮陳穎君攏攑頭看。邵曉明穿烏色的òo-bà、合軀的淺色西裝褲，尻脊對阮當咧共雨傘顫予焦。
「外口有落雨諾？」
陳穎君對膨椅頂懸徛起來，行去到邵曉明後壁，替伊共褪落來的òo-bà收予好。
邵曉明回頭，佮愛人仔輕輕仔相唚。
「嘿啊，好佳哉是停車了後才落的，無啥沃著。」
「檢查結果按怎？」陳穎君共問。
「仝款，育晨講我的狀況真穩定，以後半年轉去看一改就好。」
邵曉明斡過來對我講：「著啦，小陸，育晨愛我共你講，叫你轉去的時順紲去7-11提伊買的物件，面容美容器啥物貨的，伊講暗時仔欲做yoga無閒。」
「又閣買彼種物件？是著抑毋著，伊進前毋是才買啥物瘦面的輪仔？」我崩去。
「羅醫師家己趁家己用，你是有啥物資格共人管唅？」陳穎君佇邊仔唱聲。
「毋是啊，伊一工到暗買甲彼寡無路用的美容用品，伊已經有夠媠的媠矣呢？而且伊逐改買新的𨑨迌物仔轉去厝裡，攏嘛用無兩工就囤佇遐，干焦網路買的就囤兩櫃仔，我的衫都強欲無所在囥矣。」我實在是擋袂牢捎咧一直唸。
「育晨平常時工課壓力遐大，我今仔日去看，伊掛號都掛甲百外號矣，會佇網路買物件嘛是為著欲敨放壓力啦。」邵曉明足貼心仔講。
這是有影，羅育晨最近予人交代一个研究案，著愛收大量的病例，逐工攏著早起出門半暝仔才轉來，除了早起雄雄狂狂唚一下以外，和欲見伊一面都足困難。
我佮伊交往三年，若朋友若愛人，平常時雖然袂當講是黏黐黐，毋過遐久無通坐落來做伙食一頓飯，講實在的有淡薄仔思念。
「厝稅敢毋是羅醫生咧納，你一个Alpha蹛人的食人的，閣一日到暗怨東怨西，有夠凍霜的。」陳穎君照常咧共我唱。
「我有咧納好無？差佇我納一份伊納四份爾爾啊！」我共應。
「姜叔，Alpha若傷凍霜，是會予人討厭的喔。」陳佳映佇邊仔喝燒。
「這是刻板印象好無？恁遮的一點仔平權概念都無的人！」
陳佳映今年對小學仔畢業，誠優秀去領著市長獎，閣代表全校畢業學生致詞。
熱天尾開始，陳佳映出現分化初期的情形，伊的皮膚較烏、身軀的毛變濟，開始轉聲，得欲懸過伊的Omega爸爸，下身嘛開始出現假的陽物。
伊照按算分化做Alpah這件代誌，予我感覺安慰以外，嘛感覺淡薄仔心酸。畢竟伊是規个陳家佮我上má-tsih的人，比姜生和我閣較親。
想著我佮伊以後同性相斥，陳佳映可能無法度閣唚我、抱我，我就感覺淡薄仔遺憾。向望伊的氣味毋通是三媽臭臭鍋就好矣。
姜生足倚靠這个干焦一半血緣的阿姊，伊定定綴佇陳佳映尻川後。
小映是足標準的小弟癖，附近的囡仔若敢欺負姜生，越頭就會予小映蹔甲無地去，伊閣一工到暗講以後欲娶姜生轉去厝裡。
看著姜生佮陳佳映，定予我想著我佮阮阿兄姜伍(Kiunn Ngóo)，心內足濟感慨的。害我不忍心共陳佳映講『骨科』是無結果的。
姜生個性閉思，定定一个人守佇角仔。又閣無膽，路裡看著車、看著狗仔，定予人驚甲吼出來，若是佮佇外口踢球比起來，姜生閣較佮意踮室內看冊，幼稚園老師攏講姜生未來有八成的機會是Omega。
毋過我和邵曉明攏無講著這件代誌，干焦佮囡仔講：「毋管分化做啥物，你就是你、毋通予分化來決定你是啥物人。」
毋知姜生聽有抑聽無，毋過我知影，總有一工伊會了解。
「著啦邵邵，學校遐你敢請假請好矣？」
邵曉明行去姜生邊仔，替伊蓋被，唚伊睏去的面。
「請好矣。我這馬升等，毋免兼通識，社哲所的課有新來的助理教授代理上課，所以無問題。」
舊年寒人，邵曉明嘛順利通過升等評議，成做L大學社會系上蓋少年上蓋媠的Omega副教授。
學校當然又閣是真濟風言風語，毋過這馬的邵曉明，已經會當綴咱笑笑仔談論遐的五四三，譬論講伊提供前輩Alpha教授性服務，才有通佇學術界徛起啥貨的。
「啊？敢講恁兩个又閣欲出國渡假？毋是才對北海道轉來爾爾？」我戇去。
「這改無欲出國，是欲去宜蘭溫泉旅館蹛三工兩暝爾爾，佮阮事務所的同事。」
陳穎君若無代誌按呢共邵曉明的腰攬牢牢，竟然閣對我笑甲足歡喜。
「兩个囡仔著愛麻煩你矣！阿生後禮拜一愛注預防射，你愛會記得提伊的健保卡佮黃卡，啊猶閣有，小映拜二愛轉去學校，嘛愛麻煩你送伊去矣。」
這个時陣姜生予人吵精神，佇膨椅頂懸大聲吼，我趕緊共抱起來安慰。
「無nooh，我嘛是有工課的呢！你毋通見擺攏佇出發前一工才共我講……」
我那共姜生抱咧搖，那踅踅唸。
「小陸，歹勢著愛麻煩你矣，我和穎君足久無國內旅遊矣。」邵曉明插喙。
「無無無，邵大哥你毋免會失禮。我是講你邊仔彼个Beta……陳穎君你敢袂過傷爽，講啥物欲予我變做一家伙仔，根本就是共我當做免錢奶母咧用敢毋是？」
「這馬才發現已經傷晏矣。何況你是姜生的親阿爹呢，哪會當講是奶母啊？」
「姜叔，Alpha若傷凍霜，是會予人討厭喔。」
「K__！恁遮的輕視A權的人，攏毋驚我去共恁告喔！」
> > . . END
字詞解說：
òo-bà：大衣
敨放 tháu-pàng：鬆綁、解放
黏黐黐 liâm-thi-thi：黏搭搭
凍霜 tàng-sng：小氣
轉聲 tńg-siann：青春期聲音變低沉
陽物 iông-bu̍t：陰莖，比較避諱的說法
má-tsih：死黨、關係好
小弟「癖」 phia̍h：嗜好、習慣，原文中是弟控
蹔 tsàm：跺、踢、踹
注射 tsù-siā：打針
踅踅唸 se̍h-se̍h-liām：碎碎唸
晏 uànn：晚
沒有留言:
張貼留言