--
[ 漢羅版本 ]
對咖啡色ê捷運科技大樓站出站，行過倒手爿ê十字路口，遠遠仔就會當佇彼片窗仔內看tio̍h伊ê尻脊；遐是台北教育大學設立ê 「北師美術館」，當咧展出ê大理石雕塑〈甘露水〉，是今年全台灣藝術界上蓋要意ê，毋但是因為黃土水所做ê〈甘露水〉入選帝展拄好滿一百年，嘛是因為這座消失幾十年ê作品，總算佇今年uì台中張家ê工場內底彼跤柴箱仔，再度出現佇台灣人ê面頭前。
其實〈甘露水〉佇張家ê風聲已經誠久，較早mā捌有人佮張家接觸，因為各種因素in拒絕幾若改，一直到今年，張家後代才共伊『還』予政府，佇12月18號開始ê 「光—臺灣文化的啟蒙佮自覺」展覽開幕，代表張家致詞ê張士文講，in爸爸捌講過，若是本省人（台灣人）開始理解外省人、外省人嘛知影必須愛尊重台灣人ê時，就是共〈甘露水〉還予國家ê好時機；雖然我對目前台灣政治ê理解可能和in無啥仝款，毋過猶原真感謝in替台灣保存這座重要又閣美麗ê作品遐爾久ê時間，予咱有機會看著伊。
展覽自12月18號開始，一直到明年ê 4月24號，攏會當佇台北市ê北師美術館看會著，毋過欲參觀ê人愛會記得先去北師美術館ê網站預約，才袂到現場煞無通入去。
雖罔這場展覽上吸引人的就是消失四十外年ê 〈甘露水〉，毋過伊就若像藥引，是欲引起逐家行入來熟似其他仝年代ê重要事件、人物猶閣有作品，因為2021年嘛是台灣較早有心的文人創立文化協會ê百年紀念；文化協會ê創立，是欲透過文字、智識、藝術來提升台灣人ê意識，予台灣人有機會做家己的主人，所致佇這場展覽內底，除了會當看著陳澄波、李梅樹遮的畫家ê作品，閣會當看著文化協會甚至尾仔臺灣民眾黨成立ê文件，規个展覽ê重點毋但是台灣人藝術發展ê程度，猶閣有台灣人佇無仝款ê領域內底拚勢ê痕跡。
〈甘露水〉ê媠，是伊將咱自細漢看著西方媠ê標準搝倒轉來看著咱台灣人ê媠，對西方ê神話故事搝轉來看著咱是一个海島、有家己ê故事，〈甘露水〉ê媠，是台灣人ê互相疼痛，予張家in願意守護一座雕塑超過四十冬，〈甘露水〉ê媠，是不管佇1921年抑是2021年，伊ê存在，攏提醒台灣人，咱會當自信溫柔徛佇這个世間。
你敢已經透過你ê目睭，去看過伊ê光？若是猶未，毋通閣躊躇，有〈甘露水〉展出ê這場「光—臺灣文化的啟蒙佮自覺」是絕對袂當閬過嘛絕對袂予你感覺後悔ê展覽。
Gán-chêng ê kng:
chham-koan “kam-lō͘-chúi” tián-chhut.
Ùi ka-pi-sek ê chia̍t-ūn kho-ki-tōa-lâu-chām chhut-chām, kiâⁿ kòe tò-chhiú-pêng ê si̍p-jī-lō͘-kháu, hn̄g-hn̄g-á
tiō ē-tàng tī hit phìⁿ thang-á lāi khòaⁿ-tio̍h i ê kha-chiah, hia sī Tâi-pak kàu-io̍k tāi-ha̍k siat-li̍p ê “Pak-su bí-su̍t-koán”,
tng-leh tián-chhut ê tāi-lí-chio̍h tiau-sok “Kam-lō͘-chúi”, sī kin-nî
choân Tâi-oân gē-su̍t-kài siōng-kài iàu-ì--ê. M̄-nā sī in-ūi N̂g Thô͘-chúi
só͘ chò ê “Kam-lō͘-chúi” li̍p-soán tè-tián tú-hó móa chi̍t-pah-nî, mā-sī in-ūi chit-chō siau-sit kúi-cha̍p-nî ê chok-phín, chóng-sǹg tī kin-nî ùi
Tâi-tiong Tiuⁿ--ka ê kang-tiûⁿ lāi-té hit-kha
chhâ-siuⁿ-á, chài-tō͘ chhut-hiān tī Tâi-oân-lâng ê bīn-thâu-chêng.
Kî-si̍t “Kam-lō͘-chúi” tī Tiuⁿ--ka ê hong-siaⁿ í-keng
chiâⁿ kú, khah-chá mā bat ū-lâng kah
Tiuⁿ--ka chiap-chhiok, in-ūi
kok-chióng goân-sò͘ in kī-choa̍t kúi-lō-kái, it-ti̍t kàu kin-nî, Tiuⁿ--ka āu-tāi chiah kā
i “hêng” hō͘
chèng-hú, tī 12goe̍h 18hō khai-sí ê “Kng—Tâi-oân bûn-hòa
ê khé-bông kah chū-kak”tián-lám khui-bō͘, tāi-piáu Tiuⁿ--ka tì-sû ê Tiuⁿ Sū-bûn kóng, in
pa-pa bat kóng-kòe, nā-sī Tâi-oân-lâng khai-sí lí-kái gōa-séng-lâng, gōa-séng-lâng mā chai-iáⁿ
pit-su ài chun-tiōng
Tâi-oân-lâng ê sî, tiō-sī kā “Kam-lō͘-chúi” hêng hō͘ kok-ka ê hó sî-ki. Sui-jiân góa tùi bo̍k-chêng
Tâi-oân chèng-tī ê lí-kái khó-lêng hām in bô-siáⁿ kāng-khoán, m̄-koh iu-goân chin kám-siā in thè Tâi-oân
pó-chûn chit chō͘ tiōng-iàu iū-koh bí-lē ê chok-phín
hiah-nī-kú ê sî-kan, hō͘ lán ū ki-hōe khòaⁿ-tio̍h i.
Tián-lám chū 12goe̍h 18hō
khai-sí, it-ti̍t kàu mê-nî ê 4goe̍h 24hō, lóng ē-tàng tī Tâi-pak-chhī ê Pak-su bí-su̍t-koán khòaⁿ-ē-tio̍h, m̄-koh beh chham-koan ê lâng ài ē-kì-tit seng khì Pak-su bí-su̍t-koán ê bāng-chām ī-iok, chiah
bōe kàu hiān-tiûⁿ soah bô-thang ji̍p-khì.
Sui-bóng
chit tiûⁿ tián-lám siōng khip-ín--lâng
ê tiō-sī siau-sit sì-cha̍p gōa
nî ê “Kam-lō͘-chúi” , m̄-koh I tiō ná-chhiūⁿ ioh-ín, sī beh ín-khí ta̍k-ke kiâⁿ
ji̍p-lâi se̍k-sāi kî-thaⁿ kâng
nî-tāi ê tiōng-iàu sū-kiāⁿ, jîn-bu̍t iah-koh ū chok-phín, in-ūi 2021nî mā-sī khah-chá ū-sim ê
bûn-jîn chhòng-li̍p Bûn-hòa
hia̍p-hōe ê pah-nî kì-liām. Bûn-hòa
hia̍p-hōe ê chhòng-li̍p, sī beh thàu-kòe bûn-jī, tì-sek, gē-su̍t lâi thê-seng Tâi-oân-lâng ê ì-sek, hō͘ Tâi-oân-lâng ū ki-hōe chò ka-kī
ê chú-lâng, só͘-tì tī chit-tiuⁿ tián-lám lāi-té, tû-liáu ē-tàng khòaⁿ-tio̍h Tân Têng-pho, Lí Mûi-chhiū chia--ê ōe-ka
ê chok-phín, koh ē-tàng khòaⁿ-tio̍h bûn-hòa hia̍p-hōe sīm-chì bóe-á Tâi-oân bîn-chiòng
tóng sêng-li̍p ê bûn-kiāⁿ, kui-ê tián-lám ê tiōng-tiám m̄-nā sī Tâi-oân-lâng gē-su̍t hoat-tián ê thêng-tō͘, iah-koh ū Tâi-oân-lâng tī bô-kâng-khoán ê léng-he̍k lāi-té piàⁿ-sè ê hûn-liah.
“Kam-lō͘-chúi” ê súi, sī I chiong lán chū sè-hàn khòaⁿ-tio̍h se-hng súi ê
phiau-chún giú tò-tńg-lâi khòaⁿ-tio̍h lán Tâi-oân-lâng ê súi, ùi se-hng ê sîn-ōe kò͘-sū giú tńg-lâi khòaⁿ-tio̍h lán sī chi̍t-ê hái-tó, ū ka-kī ê kò͘-sū. “Kam-lō͘-chúi” ê súi, sī Tâi-oân-lâng ê
hō͘-siong thiàⁿ-thàng, hō͘ Tiuⁿ--ka in
goān-ì siú-hō͘ chi̍t chō͘
tiau-sok chhiau-kòe sì-cha̍p-táng. “Kam-lō͘-chúi” ê súi, sī put-koán tī 1921nî ia̍h-sī
2021nî, i ê chûn-chāi, lóng thê-chhéⁿ
Tâi-oân-lâng, lán ē-tàng chū-sìn un-jiû
khiā tī chi̍t-ê sè-kan.
Lí kám í-keng thàu-kòe lí ê ba̍k-chiu, khì khòaⁿ kòe i ê kng? Nā-sī iah-bōe, m̄-thang koh tiû-tû, ū “Kam-lō͘-chúi” tián-chhut ê chit-tiuⁿ “Kng—Tâi-oân bûn-hòa ê khé-bông kah chū-kak” sī choa̍t-tùi bōe-tàng làng-kòe mā choa̍t-tùi bōe hō͘ lí kám-kak hiō-hóe ê tián-lám.
沒有留言:
張貼留言