台文翻譯練習 || 許赫 - 再生0826

作者：許赫

本底ê文章Link：[爸爸說：你死過一次。再生0826］ 

　　最近tshuā爸爸去看醫生，他真kah意講一个故事，伊講仰賢你敢知影？你細漢ê時死過一擺。出世70工ê時陣，你就死矣。

　　爸爸講彼工我一直會記得，我猶koh咧架枋模，接到恁阿母敲予我ê電話，我去工地主任遐接，恁阿母kā我講：「你去請一个翕相ê來，阿弟仔無效矣，護士來kā大筒攏剝掉矣，這馬阿弟仔軟kô-kô，kā拍kā摃kā叫攏袂應矣。」
　　然後爸爸繼續講，我就kā工地主任請假，koh問伊ài去佗位揣翕相館？工地主任叫我去問一个蹛台北ê師傅，我問彼个師傅，叫做阿來ê，伊是你ê救命恩人。阿來虧我講翕相beh創啥，beh結婚喔？我講m̄是啦，是阮囝無效矣，翕一張相片留做紀念。
　　阿來聽了真歹勢問我啥mih時陣ê代誌？我講拄才啦，講叫袂精神矣。阿來騎跤踏車講beh tshuā我去，直直騎直直騎，騎到華西街，到龍山寺邊仔，真濟人咧賣青草，阿來入去其中一間，提一袋八卦紅（刺球）出來，伊講：喂，五箍，趕緊轉去kā刺挽掉，磨汁，予恁後生lim。

　　這个時陣我問爸爸，這敢有醫學根據？爸爸講，對啊，我就問阿來你買這創啥？我要揣ê是翕相ê。阿來講：「囡仔死矣當然ài先救轉來，救活才去翕相啦。」我罵伊講這八卦紅那會有效，莫浪費我時間。阿來講：救袂轉來你敢有差？若救轉來你m̄就爽死。到時兩包薰感謝我就好。

　　阿爸提一袋八卦紅轉去厝裡，用挽豬毛ê giap仔揀八卦紅ê刺，驚刺會傷到囡仔，斟酌挽幾改啊，然後磨做汁，揣lim了ê酒矸仔洗清氣，倒入去。然後趕緊騎跤踏車到台北兒童病院，已經是下晡，中央耽誤幾若點鐘。到病院，媽媽本來beh罵他那會遐爾久才來，罵無兩句，就哭kah講袂出話。爸爸到ê時陣，護士來問講啥mih時陣beh辦出院，爸爸講等下我予伊lim一个藥仔。護士無允准，爸爸就大聲問伊是按怎m̄准？護士長kap醫生過來關心，護士長用手勢叫護士恬恬，護士伸手來beh搶爸爸手裡ê酒矸仔，講彼內底是啥攏m̄知，kā囡仔飼死去是啥人ê責任？M̄過護士ê手伸過來ê時，醫生kā伊ê手掠咧，kā護士搖頭。爸爸說：「看到彼个搖頭，心就涼一半矣。」

　　爸爸就開始用彼罐紅記記ê物件kā我灌，彼ê時陣我身軀頂已經換一su新衫矣，媽媽去買ê，送我最後一段路ê禮物。八卦紅ê汁根本無法度灌入去我ê喙裡，一直對喙邊仔流出來，kā新衫用kah紅koh垃圾，敢若吐血仝款。媽媽koh罵爸爸咧發啥mih神經，衫用kah按呢beh按怎翕相？醫生mā佇邊仔苦勸，這个囡仔天生心室肥大，去teh著肺臟，才會氣喘袂過，m̄是靠你灌草藥仔就會好ê。
阿爸講，in講ê我攏有咧聽，m̄過我無時間管in，你規身軀軟kô-kô，m̄過喙齒根咬足絚，我提lài-tah出來kā你ê喙齒kiāu開，硬kā八卦紅灌入去，灌灌--ê m̄知影偌久，你竟然tsa̍k著直直嗽，護士罵講囡仔就已經死矣koh按呢kā折磨，無看過這種人。醫生反應無仝款，喝講急救急救，趕緊kā機器sak過來。

　　我問阿爸講，啊後來敢有救活？阿爸罵我講那會遐爾戇，無救活你那會坐佇這開車。足戇--ê。

　　原來我捌死過一kái，斷氣幾若點鐘，後來koh活過來。因為阿爸清彩信建築師--ê介紹草藥仔，kā無根據ê民間藥方當做誠實--ê，koh開真濟點鐘去挽刺磨汁。M̄過我家己ioh，kap藥仔效果可能無關係，是tsa̍k tio̍h才精神--ê。



--

Atshing：
真感謝許赫願意予我翻譯這篇，拄看tio̍h ê 時陣就感覺伊ê氣口足適合用台文來寫，liâm-mi留話請伊予我來翻譯，逐家會當那看那唸看覓。