授權翻譯：唯社文創 www.plurk.com/onlyheart2020
作者：orangeumi 橙海
台文翻譯：Àm-sî暗時工作室
《關於二寶》 台文翻譯版
江予舟本底閣咧煩惱有身的時是愛按怎度，伊有江胤佐的時是家己一个人蹛，彼當陣何晏左猶毋是公眾人物，伊佇大陣人內底無遐顯目，毋過這馬佮何晏左結婚蹛做伙，傷過容易予人注意著矣。
伊原底規劃講，敢是愛去東部蹛幾個月仔，家己做麭、煮食，離其他人遠遠遠，嘛就較袂予人發現。
想袂到疫情改變伊的計畫，嘛無完全是歹代誌。逐个人攏予人要求掛喙罨，出外無容易予人認出來，伊閣掛烏仁目鏡，換一台車來駛，猶原過甲誠四序。
但是公司彼爿伊猶是暫時離開矣，雖罔想欲上班上到無法度藏肚才閣講，毋過何晏左彼種袂輸伊去加上班，二寶連鞭就會無去的款，毋知是咧緊張啥物，甚至準備大大細細的敲字盤，伊若欲去上班，何晏左就隨家己罰跪，罰跪的理由是照顧有身的翁婿照顧甲無好。
江予舟：「……」準煞，橫直伊嘛毋是一定愛上班，莫去就莫去。
江胤佐上課下課接送嘛予何晏左來處理，伊苦袂得共過去江予舟身上的擔仔攏共擔過來，規工干焦想欲愛江予舟倒咧歇睏，共江予舟弄甲煩死，直接咧產檢的時請醫生好好仔對何晏左教育，才解決何晏左各種搝後跤的行為。
嘛因為全世界攏變去，台灣逐工攏有疫情記者會轉播佮疫苗相關新聞，記者傷過無閒，有身的九個月竟然就按呢順利過去矣，何晏左參與破腹生囝，是親手鉸斷二寶肚臍帶的人。
江予舟有注麻射，彼陣袂疼，何晏左抱清理好的囡仔予江予舟看，江予舟看著伊的左哥目屎留規面。
何晏左講：「小舟，辛苦你矣。」停一下閣講：「小舟，你看伊若像你咧，伊這馬一定是全世界生甲上好看的紅嬰仔。」
江予舟又閣感動又閣愛笑，紅嬰仔的面就猶未展開，規面皺襞襞，到底是佗位咧好看矣，伊無了解。
毋過伊知影𪜶兜左哥有偌愛伊。
江予舟的無法了解無去礙著何晏左相連紲翕兩千張𪜶兜紅嬰仔的相片，因為疫情，無通予江胤佐做伙來病院，等到𪜶出院的時，戇老爸又閣繼續翕紅嬰仔佮江胤佐，翕甲和江胤佐都戇去矣。
「爹地，弟弟敢毋是一直攏咧睏，是按怎你欲一直翕我佮伊咧？伊敢毋是攏無變？」
「有。」何晏左ni̍h拳頭，目睭仁閃閃爍，「伊每一分每一秒攏咧大漢，攏佮前一秒無仝款。」
江胤佐用 這是咧洗腦乎 的眼神共何晏左相一下，就家己走去揣奶母陪伊耍𨑨迌物矣。
江予舟笑甲破腹的空喙淡薄仔疼，這是伊頭一改對江胤佐的面看著這款厭𤺪何晏左的表情。
「好啦，較站節咧，毋免遐爾離譜。你無看佐佐都無法度忍受你矣？」江予舟共苦勸。
何晏左頕頭聽話，「好啦，小舟講的我著愛聽，按呢就減翕一張啦。」
江予舟無言。兩千張減翕一張，彼嘛有一千九百九十九張好無？煞煞去，無愛插伊矣。
就予何晏左做一个歡喜過頭的戇老爸，江予舟貧惰插伊，何晏左對瘦卑巴的猴山仔翕甲變做肨奶肨奶的紅嬰仔，安然自在。
𪜶猶是拜託厲害的江媽媽來鬥相共做江予舟的月內，若江胤佐就予幾个大人佮奶母輪流𤆬咧耍，日時閣會去上課，時間嘛袂歹度。
二寶當初時佇腹肚內的偏名是航航，原因是何晏左講彼个細粒子，未來一定會親像航空母艦仝款勇壯。江予舟心內煞是清楚，這佮伊號佐佐的名的原因誠成。
何晏左是因為伊名內底有舟，所以共囡仔名號做航，航嘛是對舟來的。
真正欲號名報戶口的時陣，何晏左開始焦心，按怎號都號袂好。
何晏左足苦惱的，「本底想欲用伃這个字，想講佮佐這字足相成。毋過伃的意思我無遐佮意，毋知欲按怎號。」
江予舟無遐講究，「宇啦，宇宙的宇，宇航。」
「宇傷過普通矣。」何晏左應講：「毋是，小舟我毋是講你的意見無好，我是想講，咱敢欲像胤佐按呢，號一个較特殊的名。」
「宇航無夠特殊？」江予舟輕輕仔共相一下。
何晏左險險想欲去共敲字盤搬來超前準備一下，「毋是，宇航嘛真特殊，毋過伊若叫做江宇航的話，名唸起來兩个音佮你是仝款的，別人就會當做恁是兄弟。」
江予舟心內想講，啥人講欲予航航姓江矣，伊偏偏仔欲予航航姓何，毋過伊這改吞落來啥物攏無講，因為伊早就佮何晏左講過幾若改欲予航航姓何，攏予何晏左拒絕。
何晏左罕得堅持傳統欲予兄弟姓仝姓，江予舟心內了解，對方只是疼惜家己生囡仔，希望囡仔嘛姓江。
毋過江予舟感覺何晏左應該真歹號名，伊就佇邊仔看何晏左一个名號過一个，閣一个一个劃掉，號到伊做月內出關的彼工。
何晏左去上班矣，江媽媽咧𤆬航航，𪜶算是幸運，航航是一个足重眠的囡仔，猶未滿月就睏過暝，而且性地誠好，和腹肚枵都袂著急，干焦吼幾聲予大人聽著就準煞，江媽媽𤆬起來袂辛苦，伊嘛才放心予江媽媽𤆬，等待約好欲長期合作的奶母過來接手照顧航航。
伊共文件攢予好勢，佮江媽媽交代一下了後就出門矣。
嫌揣車位麻煩，伊叫計程車，佇車頂發訊息予何晏左。
寶貝小舟：敢咧無閒？
寶貝小舟：我欲去共航航報戶口矣喔。
無看著何晏左回應伊嘛無著急，橫直伊嘛算看清楚矣，正經予何晏左號兩個月嘛號袂出一个完美的名，不如伊家己去共囡仔的戶口報予好，生米煮成飯，就無需要閣操煩矣。
何晏左這工是真正無閒，無閒到欲去接佐佐的時伊才有閒看訊息，等看著訊息伊隨就回覆。
囡仔𪜶爹地：！！！？？？
寶貝小舟：早就辦好矣，傳予你看。
江予舟將戶口簿仔的相片傳過去。
何晏左相「次男 何宇航」彼幾字相誠久。
彼工，江胤佐一看著來接伊的何晏左，感覺淡薄仔奇怪。
「爹地，你的目箍哪會紅紅？」江胤佐帶疑咧問。
何晏左共江胤佐牽咧，「Uh，佐佐，恁爸爸是全天下上好的查埔人，我永遠愛伊！」
江胤佐對爸爸有身了後聽類似的話聽甲耳仔強欲出油矣，對一開始感覺爹地有夠使人感動的，綴咧吼足久，到尾仔感覺，好啦，又閣發作矣，到今已經是老神在在。
「喔，我嘛感覺爸爸是全天下上好的查埔人，我嘛永遠愛伊。」五歲的江胤佐 ，已經學會曉得定矣，「爸爸是做啥物代誌予你遮爾感動咧？」
「伊予弟弟綴我姓！」何晏左牽江胤佐上車，幫伊固定咧安全坐椅頂懸，「伊遐爾辛苦有身生囝，煞予航航綴我姓，你講伊是毋是足愛我的？」
五歲的江胤佐已經知影啥物是姓矣，毋過伊完全毋捌姓啥佮愛抑是無愛的關係，干焦會當袂博假博，真認真咧應付𪜶爹地：「愛，伊上愛你！」
何晏左足歡喜的共餅窒佇江胤佐手裡，「Mh，我嘛按呢想！」
何晏左𤆬江胤佐轉去到厝，洗手面洗身軀，拄有名姓的航航罕得精神，䖙佇搖椅頂懸，好奇的用大大的目睭仁看這个世界，江胤佐走去邊仔，kuh-tsih-kuh-tsih共航航弄，拄開始發展社交型笑容的航航雄雄就笑矣。
「爸爸、爹地、阿媽，航航對我笑呢！伊敢是佮意我？」
「著啊，伊上佮意你。」江予舟那笑那講。
何晏左早就佇邊仔翕相翕甲起痟，那翕那講：「小舟，多謝。」共家己搧喙䫌的感覺誠好，這對兄弟明明就無仝姓，感情猶是誠好。
小舟予航航姓何，伊確實感動，伊遮濟年的努力，想欲予家己脫離何家遐的垃圾代。伊哪會毋知，小舟是用號名來共講，你誠好，你佮何家其他的人無仝款，你值得航航綴你姓。
江予舟笑笑，無加講啥物。
何晏左誠有範勢的搬跤架仔來，請江媽媽佮江予舟嘛過去，共倒頭計時揤落去，連鞭走去鏡頭頭前，卡擦一聲，共美好的瞬間翕起來。
相片內底，兄弟兩个無人看鏡頭，煞那對相那笑，江媽媽看兩兄弟仔，喙脣邊嘛是笑容，何晏左共江予舟攬牢牢，若像欲共人唚的款，江予舟好親像欲覕，喙脣邊煞是笑意。
何晏左落尾抑是偷唚著，毋過，江胤佐嘛共航航唚一下唚甲規面澹糊糊。
平常時驚航航破病，𪜶袂去唚航航，嘛無欲予江胤佐唚航航，紅嬰仔實在是傷過荏身矣，有受著衛生教育的江媽媽嘛知影袂當清彩唚航航，抱航航先去拭面順紲去檢查尿苴仔矣。
「失禮，我看弟弟傷過古錐，忍袂牢就共唚落去矣。」江胤佐感覺誠歹勢。
「無要緊。」江予舟回答，畢竟唚都唚矣，共罵嘛無效，伊話頭轉踅，看對何晏左遐去，「你咧？你哪會欲做歹模樣？」
「失禮，我嘛看你古錐，就忍袂牢矣……」何晏左真無辜，「你敢袂當嘛共我講無要緊？」
江予舟微微笑：「佐佐，替爸爸去共敲字盤提過來。」
江胤佐提無線的敲字盤噸噸噸走過來的時，江媽媽嘛拄仔好抱航航轉來到客廳。
「佐佐，你提敲字盤欲創啥？」江媽媽感覺疑怪。
「我欲敲字！」何晏左隨澄清。
「我欲耍的！」江胤佐仝一个時間按呢應。
看大細漢攏咧替伊掩崁，江予舟的喙脣邊出現幸福的笑容。
「khe̍h-khe̍h。」予人抱佇咧江媽媽身軀頂的航航，毋知敢是感染著這个氣氛，竟然咧笑。
這改，規家伙仔都攏笑矣。
> > ... END
真感謝 唯社 和作者 橙海 ，願意予 暗時工作室 這个翻譯耽美小說的機會。
其實佇這改翻譯進前，負責翻譯的 烏籽oo-tsí 已經足～久無看耽美小說矣，規个人對愛情故事攏強欲無啥期待，若像是lian去的花，一點仔活力都無 orz
好佳哉第一篇耽美小說翻譯，就會當翻著誠厲害的 橙海老師 的作品，予我對耽美小說的熱情真緊就閣點著矣！
希望逐家看了有佮意，若對翻譯的詞抑是文法有啥物想法、建議，攏歡迎留話報予我知喔！
沒有留言:
張貼留言