推友問：
Pháiⁿ-sè lâi kiáu-jiáu.LMJ ē-tàng chèng-khak piau-sī hoat-im kah siaⁿ-tiāu, sī Tâi-gí ha̍k-si̍p siōng lī-piān ê kang-kū.M̄-koh, siū Hôa-gí si̍t-bîn kàu-io̍k ê Tâi-oân-lâng ē pâi-thek LMJ, sī án-chóaⁿ lâi thui-kóng khah hó?Jû-hô pàng-sak ài ēng Hàn-jī ê Tiong-Goân ì-sek?
（我用漢羅濫koh寫一改囥佇上下跤，若有影看無全羅馬字，才麻煩你先搝落去下跤看）
首先ài kā你會失禮，làng tsiah-tsuē工才來kā你回，主要是這个題目實在傷大矣，我驚我會講袂好勢，心內mā無khah好ê答案，驚你會感覺講我ê回答足àu，抑是會感覺無歡喜，只好一直囥tī心內，揣時間來回覆看覓。
我ê標題按呢寫、頭段按呢講，除了是對咱未來建國kah語言意識ê向望，其實mā是我所感受tio̍h ê困難。自2016了解tio̍h台語有字了後，逐年tī差不多ê月份，攏會有類似ê語言議題teh冤，當然愈冤，加入來熟似母語ê人就閣khah tsuē（上至少我感覺我ê仝溫層是按呢）
M̄-koh這mā表示咱覺醒ê速度猶原比袂過中華民國teh kā台島人洗腦ê速度，若無對體制內先kā中國優先ê歷史、地理意識改變，新ê台島人猶原會足簡單就hông說服講家己「Mā是中國人」所致ài有人teh體制內做穡是真重要，我想這mā是tsuē-tsuē台語人/台員人teh看中華民國ê選舉kah政治時陣ê心內話：M̄是咱teh偌ài tsia-ê政治人物，是透過tsia-ê人，咱向望in會當kā中國ê物件漸漸來排除，按呢若準老ê咱無法度說服，上至少咱beh講母語意識、本土意識ê時陣，少年人khah容易接受。
我teh想，m̄願放sat漢字kah排斥羅馬字ê無一定是仝一陣（當然萬變不離其宗，應該心內是認為漢字才是正統，m̄-koh teh討論ê時袂意識tio̍h）我先kā in分做兩陣來討論。
第一種，雖然認為英文是重要ê語言，m̄-koh是向望囡仔ài學、ài gâu，m̄是要求家己ài會曉，所致羅馬字對in來講就無夠親切，koh ài翻頭重學，這種就會認為學羅馬字成本傷懸、會排斥。
第二種，是認為台島使用ê台灣華語漢字才是正範，中國使用ê簡體字是無好ê，失去原底漢字beh表達ê意思（定看人講愛內底無心）感覺台灣用ê漢字khah優秀，認為若台灣放sat繁體漢字，就比人袂起，其實這mā是對台島歷史文化無夠理解造成ê自卑，因為政府ê課本無kā咱教講台灣有啥值得人驕傲ê所在，學ê攏是中國彼塊土地頂懸偌好拄偌好，講咱這má得tio̍h ê，全攏是對中國hiah傳來ê，無在地文化。這種驚惶可能才是in無願意放sat漢字ê主要原因。
拄tio̍h頭一種人，我認為，就免kah伊冤，mā免講啥，只要請伊用伊想beh用ê方式來推廣有系統ê台語字就好，請伊開始寫台文，m̄管用全漢、全羅、漢羅濫，只要若開始寫，就知影問題teh佗位，推廣ê困難是啥，mā會知影講羅馬字才是對囡仔kah有心beh學台語煞無台語環境ê人成本上kē ê方式。
若真正無想beh寫，就請in捷講，甚至鼓勵in錄音來hōo逐家聽，按呢雖然伊袂曉寫，m̄-koh伊ê台語營養猶原有機會留落來，才hōo咱tsia會曉寫ê人來kā做文字整理。
若是第二種，除了kā咱ê氣力囥轉來繼續推sak台語以外，上重要ê就是有語言意識ê人mā ài去走揣其他台島ê文化歷史，而且來講hōo人知，mā ài推廣「漢字m̄是屬於中國這个所在」ê理解，按呢以後才有機會kā漢字ê重要性消滅，來hōo逐家放棄。
咱m̄是無gâu人，只是tī中華民國來到台島了後，真tsuē人攏hông刣死、
koh無通寫tī課本頂懸hông台島囡仔知影，才會hōo足tsuē人驚講無漢字，咱就無文化，m̄-koh事實就m̄是按呢。
當然，我對完全排除漢字ê可能抑是感覺悲觀，我想可能至少二十年內是無法度做kah到，因為咱無法度期待有佗一个tī中華民國體制下ê政府會主動kā漢字放sat，一定ài經過消除傷過注重中國部份ê教育、本土語言意識提昇（包括台語台ê進步、電視電影用台語kah族語製作作品、母語商業化，有koh-khah-tsuē人倚靠母語來討趁）、台島重要人物kah文化正常推廣等等ê過程，咱才有可能tī iah未kā中華民國tshia倒ê狀況之下，來開始要求政府放sat漢字。
M̄-koh這个想法目前是完全以我家己做一个台語人/台員人（not台灣人，這無仝款ài註明） ê立場來出發，iah無機會來進一步思考其他語族ê困境，可能有疏漏ê所在，向望有看tio̍h ê人會當包涵，若會當留話來討論就koh-khah感謝！
因為工課iah未結束，我先uē仙uē到tsia，期待你ê想法kah回覆，多謝！
若感覺我講kah iah-koh會用得，才麻煩你替我揤下跤ê Like，替我phah-phok仔，感謝、勞力。🙇
註：
推友問ê問題 漢羅濫版本
歹勢來攪擾。羅馬字會當正確表示發音kah聲調，是台語學習上你變ê工具。M̄-koh，受華語殖民教育ê Tâi-uân-lâng 會排斥羅馬字，是按怎來推廣khah好？如何放sak ài用漢字ê中原意識？
---
你來問、我來寫
Beh問啥？攏會使。
按怎問？寫華語、台語攏會通。
驚歹勢？會當註明莫寫你ê名。
幫助烏籽寫文章，你問一个問題我寫一篇台語文章。
希望透過這个方式hōo你對台語文章增加興趣，
mā hōo我koh-khah tsuē寫台文ê機會。
會當kā你ê問題mail來：go.kuroko@gmail.com
我會盡量來寫，向望台語ê路，咱會當做伙行。
（若有需要文章錄音，mā會使，會記得先kā我講）
沒有留言:
張貼留言