雖然你無講你是beh放棄啥，m̄-koh我第一時間想tio̍h ê就是你teh推貼頂懸推sak台語文ê行動，若準我想tîng-tânn去，你就當做我是一个想傷tsuē ê 人teh uē仙啦！
Beh推動一个原底罕得有人知影ê 代誌，本底就足困難ê，koh拄tio̍h中華民國這个大魔王，kā咱ê族人攏洗kah無母語意識、利益優先，便若講tio̍h母語議題，tio̍h-ài先論戰「學母語敢有路用？敢食會飽、趁有錢？」戰了koh 開始怪咱tsia teh推sak ê人無禮貌、脾氣䆀。
一陣無想beh學ê人吵煞，koh不時有「到底beh用白話字抑是台羅/閩羅抑是全漢字才是正統」ê內戰，久來，一定會感覺thiám。
當然以上所講ê，可能攏m̄是你感覺thiám ê原因，m̄-koh至少對我來講，一改koh一改ê論戰，有影是hōo 我變kah khah 無耐性，mā對誠tsuē代誌khah冷感，為tio̍h beh保護家己，我變做一个khah無想beh萬項台語事攏插一跤ê人，可能對別人ê角度來看，就會感覺我是放棄矣。
寫到tsia來，其實我ê心內猶原會驚，驚人會講我就是無彼个心、teh揣理由，m̄-koh心是我家己ê，準講我kā心挖出來，別人mā看無。就是因為按呢，我才會一開始就kā你回答講「當然會使放棄」，不管是放棄用推廣ê心情來寫台文，抑是放棄用溫柔ê氣口來搝人加入寫台文ê路，攏是會使得ê，因為咱知影咱家己ê母語路袂斷去，mā buē koh kiu轉去khah早彼个無要意台語hông烏白寫ê家己矣。
所以你若有想beh放棄，m̄免驚，做hōo家己會歡喜ê代誌就好，m̄-thang kā這má做ê代誌變做責任，按呢壓力傷大矣，一个殖民政府造成ê損失，無應該是hōo一个個人來揹。
我有一改kah阿華師開講，伊講一種傳染病若會當透過一个破病ê人傳hōo三个人，就算是足gâu湠ê。咱若kā講台語、寫台文看做一種浪漫ê病，只要你會當影響超過三个人來改變，台語就會有機會繼續生湠，mā一定會有人來補你這má ê位置，做溫柔ê推廣。
台語路咱做伙行。
多謝你kā我問，寫了，我對家己最近ê懷疑mā khah減寡。
---
你來問、我來寫
Beh問啥？攏會使。
按怎問？寫華語、台語攏會通。
驚歹勢？會當註明莫寫你ê名。
幫助烏籽寫文章，你問一个問題我寫一篇台語文章。
希望透過這个方式hōo你對台語文章增加興趣，
mā hōo我koh-khah tsuē寫台文ê機會。
會當kā你ê問題mail來：go.kuroko@gmail.com
我會盡量來寫，向望台語ê路，咱會當做伙行。
（若有需要文章錄音，mā會使，會記得先kā我講）
感謝你回彼呢濟文字，心內是誠感動，無毋著，我个題目就是台文。
回覆刪除看你个回文有足濟所在，是攏講出我个心內話，我認同感誠深，當然chi̍t-sî失志是攏無法度避免，但是我也是定定收著鼓勵，就親像你這phiⁿ真用心回我，也是閣予我感覺著你對台語个熱情，閣看轉來家治，其實我也是真愛台語文，有戰友，感覺是誠好个，蓋成著閣有行落去个氣力。
阿華師講一个人tò͘三个人，按呢我算成功呢！哈哈～我早就超過矣，應該也超過十人，ah bô，我來試看會使tò͘予三十人無。
親像你講个，我無可能閣變轉去彼个寫火星文个家治，會使做到佗位我是毋知影，毋閣我目前心態上，也是儘量放予輕鬆，用一種我也是家治咧練台文个心態，來發我个推文，一種同樂个心態，共我个推，變做一種我寫台文个進化史，用按呢个心態去寫是tian-tò 趣味起來。
我袂放棄，但是會差治捒大力，抑是細力捒，親像你講个，隨心意去行，人是無可能逐工攏狀況足好。
我也分享一件代誌予你知影，親像我个"每日台文"，我逐工無停寫足濟工矣，我一開始也是當做家治練習，但是我完全無想著講，有人是時常咧看，甚至是講我寫个文對伊來學習台文是真重要个短文，我知影這件代誌以後，我閣較知影我袂使停落來。
一路行到這陣也無長無短，三個外月，但是誠實是得到濟濟个前輩幫忙，按呢回想起來，行來這條路，算是我人生个意外，但也是改變我人生真重要个代誌，尚無，我會曉寫字矣 (笑)。
雖然我kā你講我beh來補眠，結果煞攏睏buē去。
刪除看tio̍h你ê回應我實在足感動，目屎強beh留落來ê彼種。
一部份是因為，雖然我這má佇推貼頂懸看起來kan-na略略仔天天，敢若攏無teh分享一寡重要ê台語意識、抑是認真鼓勵逐家來寫台文，日常生活mā講無蓋tsuē台語，m̄-koh將我內心ê想法講出來，猶原是有人會感受tio̍h我對台語ê愛Q_Q
另外一部份是，我真久無寫這種khah完整ê blog矣，會當看tio̍h有人遐認真來回應、分享心情，有影足歡喜，mā hōo我感覺我無聊想tio̍h ê這个「你來問、我來寫」活動實在足好ê。
以寫台文ê進度來講，你ê速度有影是緊呢！這mā代表你真正認真teh寫、teh分享你ê生活，我定定看你寫，攏會感覺這真正是有台語生活環境ê人才寫會出來ê，足欣羨，m̄-koh mā足歡喜。
不管是beh kā心情放khah輕鬆，抑是beh khah細力寡，我攏足支持你。
咱只要會當繼續行落去，就一應會有koh-khah tsuē人來同齊行。
改字＊上無
回覆刪除其實會使按呢交流是足好个，會使知影咱按呢塊行，路上攏是有人陪伴，也毋是干焦咱家治一个人有熱情爾爾，若有人鬥陣咧行，可能拍拚个領域無完全仝款，毋閣知影遐閣有人塊做佮家治仝款个代誌，心內就無遐呢矣希微，勇氣猶閣加兩成--khih-lih。
回覆刪除其實有對台語有感情無感情看有啦，你根本就用台語咧趁錢矣，我感覺按呢足好个。足濟人一句話拍死台語，講學台語無利純，你就是一个足好个反證矣。愛台語寫台文，愛咱个土地，閣會使用咱家治个話做經濟來源个手段，真正有夠好！
我這陣治家治个厝裡，開始塊訓練我个細漢查某囝（小六）羅馬字个能力，我用教育部个台語七百字，逐工叫伊背六七字閣考試，我有想欲叫伊去考檢定（囡仔彼種），無定著伊以後也會使親像你用台語來過生活，我綴你團个冊，也是欲來教我孫仔个教材，家治厝內个台語能力我也是想欲攏共伊giú起來。我个台語能力若無傳落去，我會真iàn-khì，閣加上阮阿母，iá 閣有治个，閣會使教我，伊是活字典。(笑)
感謝你支持我，我也會支持你，有伴，路好行。
讀著你个回文，我也是真感動，精神百倍呢！
刪除🙆🏻♀️💕
一切攏是機緣，希望我會當倚靠台語kah台文生活一世人💪🏻
作者已經移除這則留言。
回覆刪除直接讚五遍（大笑）
回覆刪除非常感謝，請問是哪一位朋友呢XD
刪除